PGL – O Paço de Marinham (Bergondo) é o palco em que participam hoje, 22 de Outubro, por volta de 75 pessoas ligadas ao ámbito da administraçom local, entre autarcas, vereadoras/es e técnicas/os de normalizaçom linguística, no II Encontro de Política Linguística desde as Administraçons Locais da Corunha.
Conforme informa a página da Coordinadora de Traballadores/as de Normalización da Língua (CNTL), no encontro, sob organizaçom da Deputaçom da Corunha, serám analisados assuntos como a normalizaçom linguística desde as cidades, os perfis linguísticos dos trabalhadores e trabalhadoras da administraçom, os convénios de colaboraçom entre a Deputaçom da Corunha e os concelhos do círculo provincial e será apresentada umha experiência de coordenaçom entre ENDL do IES de Melide e os SNL dos concelho de Toques, Sam Tisso e Melide.
Sempre segundo a CNTL, os objectivos principais deste encontro som pôr em contacto os/as diferente/as responsáveis políticos/as e técnicos/as das administraçons locais para compartilharem experiências e analisarem possibilidades de acçons conjuntas, debaterem e analisarem a responsabilidade, as necessidades e as possibilidades das administraçons locais na normalizaçom social do uso do galego e desenharem conjuntamente linhas gerais de colaboraçom e pautas de coordenaçom e criaçom de rede entre as diferente administraçons.
Os debates começárom por volta das 10h15 e encerrarám à tarde com a actuaçom do contador de histórias Candido Pazó, que fará um resumo humorístico da jornada, antes da apresentaçom das conclusons da mesma.
No encontro é prevista a participaçom do presidente da FEGAMP, Carlos Fernández Crespo, os autarcas da Laracha, Cabana de Bergantinhos e Sás, e as autarcas de Melide e Vila Santar, além de vereadores e técnicos da Corunha, Santiago de Compostela, Ferrol, Carvalho, Vimianço, Ames, Messia, Narom, Carnota, Ponte d’Eume, Arçua… até um total de quarenta cámaras municipais representadas, num universo de 94 integradas no círculo provincial da Corunha.
+ Notícia relacionada:
