ALDEIAS DE ORDES

Esplendores antigos



Aldeia de Folgoso, em Pereira (Ordes)
Aldeia de Folgoso, em Pereira (Ordes)

O pequeno lugar de Folgoso, na freguesia de Pereira, deu nome a toda umha extensa jurisdiçom durante o Antigo Regime, que abrangia as freguesias de Barbeiros, Beám, Cardama, Deixebre, Frades, Galegos, Gândara, Lesta, Marçoa, Messos, Moar, Montaos, Ordes, Oroso, Papucim, Parada, Pereira, Senra, Vila Maior e Vila Romariz, todas elas na antiga província de Santiago, menos a de Mercurim, que entrava na da Corunha. Em total, 171,5 km2 (mais que o atual concelho de Ordes, que tem 158) baixo o senhorio do Conde de Altamira[1]. A jurisdiçom teria nascido, na lógica das políticas matrimoniais da altura, da uniom entre Joana de Castro e Rodrigo de Moscoso, senhor de Folgoso.

O topónimo viria do latim tardio *filicosu, revelando um terreno abondante em filicu, iso é, fieito[2]. O nome do lugar tivo fortuna como apelido, e também na literatura cunqueiriana: Otilia Paredes, sábia de Sam Mamede de Veiras, atendeu em umha ocasiom um vizinho que colhera umha sombra ao voltar da feira de Boimorto. Otilia assegurou-lhe que se tratava de um defunto que vinha reclamar-lhe algumha promessa incumprida, e entom o vizinho caiu da burra: “Fue en Vicálvaro, haciendo el servicio militar. Dejé embarazada a la sobrina de un sargento de Pavía, pero me licenciaron a tiempo, y aunque ella me escribió y vino a verme a Órdenes un capellán castrense, yo hice aquí mi vida”. Convocada, a sombra dixo que nom perguntava por Secundino Folgoso García, que assim se chamava o impresentável emprenhador, mas polo seu sobrinho, que figera o mesmo com umha de Segóvia e agora andava emigrado na Alemanha, de eletricista. “Maña que se daban estos Folgoso con las castellanas, lo que no es tan fácil”[3].

[1] Francisco Xavier Río Barja, Cartografía xurisdiccional de Galicia no século XVIII, Santiago, Conselho da Cultura Galega, 1990, pág. 38.

[2] F. Cabeza Quiles, Os nomes de lugar, Vigo, Xerais, 1992, p. 203.

[3] A. Cunqueiro, Obras literarias en castellano II, Madrid, Fundación José Antonio de Castro, 2006.

Mapa de Folgoso, em Pereira (Ordes)
Mapa de Folgoso, em Pereira (Ordes)
Mapa de Folgoso, em Pereira (Ordes)
Mapa de Folgoso, em Pereira (Ordes)

Publicado em Aldeias de Ordes, 19,03,2018.

Carlos C. Varela

Carlos C. Varela

Carlos Calvo Varela (Ordes, 1988) colaborou e colabora com diveros meios de comunicaçom, entre os quais Novas da Galiza, Praza Pública e o Portal Galego da Língua. Estudante de Antropologia e investigador, tem publicado numerosos artigos em portais web, revistas e livros, além de realizar um reconhecido labor como dinamizador social e cultural em coletivos de Compostela e Ordes.
Carlos C. Varela

Latest posts by Carlos C. Varela (see all)


PUBLICIDADE