Encontro em Bertamiráns para a criaçom da Semente Amaía

Dia 22 de junho, às 20 horas, encontro informativo no paço da Peregrina para tentar criar umha escola Semente no vale da Amaía



germinar-v2

Após as sucedidas experiências em Compostela, Trasancos, Vigo e Lugo, poderia estar perto a primeira criaçom de umha escola Semente fora da cidade. Um grupo de mães e pais convoca um encontro informativo focado à constituiçom da Semente Amaía, que toma o nome do vale que une os concelhos de Ames e Briom, na comarca compostelana. Será na próxima sexta-feira, dia 22 de junho, às 20 horas, no paço da Peregrina (Bertamiráns).

As Escolas de Ensino Galego Semente som umha iniciativa social sem ânimo de lucro que começou em 2011 em Compostela da mão da Gentalha do Pichel. Dous anos depois nasceu a Semente Trasancos e, com o tempo, chegárom também a Semente Vigo e a Semente Lugo.

As Sementes inspiram-se todas elas polos mesmos princípios: coeducaçom, laicidade, assemblearismo, interaçom com a natureza, respeito pola autorregulaçom da criança e a integraçom no contexto do seu bairro e da cidade. Além disso, todas as atividades das escolas Semente som em galego, favorecendo a aquisiçom, conservaçom, cuidado e consolidaçom do idioma do País, que é entendido na sua dimensom internacional e como parte indissolúvel da cultura, história e futuro da Galiza.

Do grupo promotor convidam todas as pessoas interessadas a somar forças e participar no encontro informativo, em que haverá representaçom de algumha das escolas Semente já constituídas. A fórmula jurídica da escola, os trâmites administrativos, as necessidades económicas ou o guia pedagógico serám alguns dos pontos que se tratarám.

 


PUBLICIDADE